ფლიპო მარინეტის „ფუტურისტული კულინარიული წიგნი“ (The Futurist Cookbook) ნაწილობრივ მანიფესტია, ნაწილობრივ კი — არტ-ხუმრობა. ეს არის ხელოვნების შესახებ შექმნილი პროვოკაციული ნამუშევარი, რომელიც მარტივად წასაკითხ კულინარიულ წიგნადაა შენიღბული. აქ იპოვით ნაყინის რეცეპტებს მთვარეზე, შაქრით მოჭიქულ ატმოსფერულ ელექტროენერგიას, ღამის სიყვარულის ნადიმებსა და სკულპტურულ ხორცეულს. მარინეტი ასევე ავითარებს აზრს პასტის გაუქმების შესახებ, რადგან მიიჩნევს, რომ იგი არ შეესაბამება თანამედროვეობას, და მხარს უჭერს კულინარიულ სტილს, რომელიც გაზრდის კრეატიულობას. მიუხედავად იმისა, რომ წიგნში ხანდახან ვლინდება ავტორის ნაციონალისტური სიმპათიები, ეს ნამუშევარი არის სასაცილო, პროვოკაციული, უცნაური, დუნე ტრადიციების მოძულე და თანამედროვეობის სისწრაფითა და პერსპექტივებით აღფრთოვანებული.

ფილოპო ტომაზო მარინეტი 1876 წელს იტალიურ ოჯახში დაიბადა და ალექსანდრიაში, ეგვიპტეში გაიზარდა. მან პარიზში ისწავლა და იტალიაში სამართლის ხარისხი მიიღო, სანამ ლიტერატურას მიჰყოფდა ხელს. 1909 წელს მან დაწერა ცნობილი „ფუტურისტული მანიფესტი“, რომელიც მხარს უჭერდა ძალადობას, სისწრაფესა და ომს, და აცხადებდა ხელოვნებისა და ცხოვრების ერთიანობას. მარინეტის ცხოვრება სავსე იყო წინააღმდეგობებით: იგი დუელში დაუპირისპირდა მტრულად განწყობილ კრიტიკოსს, წარსდგა სასამართლოს წინაშე უხამსობის ბრალდებით და იყო იტალიური ფაშიზმის ერთგული მხარდამჭერი. ლიტერატურულ საქმიანობასთან ერთად, იგი იყო სამხედრო კორესპონდენტი იტალია-თურქეთის ომის დროს და, მიუხედავად სამოც წელს გადაცილებული ასაკისა, მეორე მსოფლიო ომში აღმოსავლეთის ფრონტზეც მსახურობდა. იგი 1944 წელს გარდაიცვალა