დევიდ ატენბოროს ცნობილი წიგნის, „სიცოცხლე დედამიწაზე“ (Life on Earth) ახალი, სრულად განახლებული გამოცემა.

დევიდ ატენბოროს დაუვიწყარი შეხვედრა გორილებთან მილიონობით ტელემაყურებლისთვის საკულტო მომენტად იქცა. სატელევიზიო სერიალმა „სიცოცხლე დედამიწაზე“ და მის საფუძველზე გამოცემულმა წიგნმა ძირეულად შეცვალა ჩვენი დამოკიდებულება ბუნებრივი სამყაროს მიმართ და ბუნების შესახებ გადაცემებისა და წიგნების ხარისხის ახალი სტანდარტი დაამკვიდრა. მათ მთელი თაობა შთააგონეს, შეეყვარებინათ ბუნება.

ცხოველებისა და მცენარეების სამყაროს შესწავლით ეს წიგნი დედამიწაზე სიცოცხლის ევოლუციის საოცარ სურათს გვიხატავს. მასში წარმოდგენილია უამრავი ცოცხალი ორგანიზმი, რომლებიც ოდესმე ჩვენს პლანეტაზე არსებობდნენ. ატენბოროს გამჭრიახი და დინამიკური თხრობა მკითხველს მილიონობით სახეობის ევოლუციის დაუვიწყარ მოგზაურობაში იწვევს — სიცოცხლის პირველი ნაპერწკლიდან იმ ლურჯ და მწვანე საოცრებამდე, რომელსაც დღეს დედამიწას ვუწოდებთ.

წიგნის პირველი გამოცემის 40 წლისთავის აღსანიშნავად დევიდ ატენბორო კვლავ დაუბრუნდა „სიცოცხლეს დედამიწაზე“, სრულად განაახლა და გააფართოვა თავდაპირველი ტექსტი და გაითვალისწინა მსოფლიოს სხვადასხვა კუთხეში მიღებული თანამედროვე სამეცნიერო აღმოჩენები. წიგნს დაემატა სრულიად ახალი, ულამაზესი ფოტომასალა, რომელიც ბუნების მრავალფეროვნებასა და სილამაზეს გაცილებით უკეთ წარმოაჩენს, ვიდრე ეს ორმოცი წლის წინ იყო შესაძლებელი.

ეს საიუბილეო გამოცემა ბუნების შესახებ შექმნილი კლასიკური ნაშრომის ღირსეული გაგრძელებაა. ის კვლავ მოხიბლავს მკითხველებს, რომლებმაც წიგნი პირველად მისი გამოცემის დროს გაიცნეს, და ამ საოცარ სამყაროს სრულიად ახალ თაობასაც გააცნობს.