პერსის უწყვეტი მცდელობა, ღმერთებისგან კოლეჯში ჩასარიცხად სარეკომენდაციო წერილები მოიპოვოს, გრძელდება. ამჯერად მას ქალღმერთ ჰეკატეს ქრცვინისა და უზარმაზარი მასტიფის მოვლა უწევს ჰელოუინის კვირაში. რა შეიძლება მოხდეს ცუდი?

რიკ რიორდანის პერსი ჯექსონის უახლესი თავგადასავალი სავსეა იუმორისტული სცენებით, ღმერთებისა და მონსტრების მრავალფეროვანი პერსონაჟებით და სხვა უამრავი სასიამოვნო სიურპრიზით.

პერსი ჯექსონი ახლა უკვე საშუალო სკოლის დამამთავრებელი კლასის მოსწავლეა და ნიუ-რომის უნივერსიტეტში ჩასარიცხად ბერძენი ღმერთებისგან სამი სარეკომენდაციო წერილი სჭირდება. პირველი წერილი მან განიმედეს თასის დაბრუნებით მოიპოვა. ახლა ქალღმერთმა ჰეკატემ პერსის კიდევ ერთი „შესაძლებლობა“ შესთავაზა — სანამ თავად ჰეკატე შინ არ იქნება, პერსიმ ჰელოუინის კვირის განმავლობაში მისი ქრცვინი გეილი და მასტიფი ჰეკუბა უნდა მოუაროს. მარტივი საქმეა, არა?

პერსი, ანაბეთი და გროვერი ჰეკატეს ერთი შეხედვით უსასრულო სასახლეში სახლდებიან და მის ჭირვეულ, საშიშ ცხოველებს ეცნობიან. სამივეს მკაცრად გააფრთხილეს, რომ არაფერს შეხებოდნენ, თუმცა, სანამ პერსი და ანაბეთი სკოლაში არიან, გროვერი ლაბორატორიაში მარწყვის არომატის მქონე წამალს ვერ უძლებს და სვამს. შედეგად, ის გიგანტურ, გააფთრებულ თხად გადაიქცევა. სახლის დალაშქვრისა და ყველაფრის დაზიანების შემდეგ გროვერი გონებას კარგავს, ხოლო გეილი და ჰეკუბა გარბიან.

ახლა მეგობრებმა ჰეკატეს შინაური ცხოველები უნდა იპოვონ და როგორმე სასახლეც აღადგინონ — ეს ყველაფერი მანამდე უნდა მოასწრონ, სანამ ჰეკატე შაბათს დაბრუნდება. მათ დასჭირდებათ იღბალი, ნახევარღმერთებისთვის დამახასიათებელი მოხერხებულობა და ძველი თუ ახალი მეგობრების დახმარება, რათა ცხოველები იპოვონ და ყველაფერი თავის ადგილზე დააბრუნონ.