მას შემდეგ, რაც რუსეთი უკრაინაში შეიჭრა, მთელ მსოფლიოში ადამიანებმა ამ ფაქტს შეძრწუნებითა და აღშფოთებით უპასუხეს. ამავდროულად, მათ იმედი და გამბედაობა შემატა უკრაინის 44 წლის პრეზიდენტის, ვოლოდიმირ ზელენსკის, შთამაგონებელმა სიტყვებმა და მამაცმა მოქმედებებმა. ის ხშირად ამხნევებს მძიმე მდგომარეობაში მყოფ თანამემამულეებს და წინააღმდეგობას უწევს ავტოკრატ მმართველს, რომელსაც ბირთვული კატასტროფის გამოწვევის ძალა აქვს.

ზელენსკი ის გმირია, რომლის საჭიროებაც არ ვიცოდით, სანამ ის არ გამოჩნდა — ან იქნებ ვიცოდით კიდეც. დღეს მსოფლიოს სურს, მეტი შეიტყოს უკრაინის მამაცი და შთამაგონებელი პრეზიდენტის შესახებ. ამის საუკეთესო საშუალებაა წიგნი „ვოლოდიმირ ზელენსკი საკუთარი სიტყვებით“ (Volodymyr Zelensky in His Own Words) — ვრცელი ციტატების კრებული, რომელშიც თავმოყრილია ზელენსკის გამონათქვამები და მოსაზრებები მრავალ საკითხზე, ომიდან და მშვიდობიდან დაწყებული, კლიმატის ცვლილებითა და ლგბტქ+ ადამიანების უფლებებით დამთავრებული.

მკითხველებს შეეძლებათ, წიგნი ნებისმიერ გვერდზე გადაშალონ და გაეცნონ ზელენსკის პოზიციას კონკრეტულ საკითხთან დაკავშირებით. იმის გათვალისწინებით, რომ ზელენსკი წარსულში კომიკოსი და უკრაინის ყველაზე ცნობილი მსახიობი იყო, კრებულში მრავლადაა ისეთი ციტატები, რომლებიც ამ ადამიანის უფრო მრავალმხრივ და ღრმა პორტრეტს გვიხატავს — იმ ადამიანისას, რომელმაც მთელი მსოფლიოს ყურადღება მიიპყრო და უამრავი ადამიანი შთააგონა.