„ამ წიგნმა სრულიად შეცვალა ჩემი ხედვა სამყაროზე... ორიგინალური და უაღრესად გონივრული ნაშრომია.“ — სათნამ სანგერა, წიგნის Empireland ავტორი.

მსოფლიოს საზღვრები დედამიწის ერთ რუკას ქმნის, ფული კი — სრულიად განსხვავებულს. ჟურნალისტის ეს მომნუსხველი გამოკვლევა გვიხსნის პარალელური სამყაროს არსებობას, რომელიც სახელმწიფო კანონებისგან დიდწილად თავისუფალია და გვიჩვენებს, თუ როგორ სარგებლობენ ამ სისტემით მდიდარი და გავლენიანი ადამიანები.

მსოფლიო რუკაზე გამოსახულია ის სამყარო, რომელიც ჩვენთვის ნაცნობია: სუვერენული სახელმწიფოები, რომლებიც საკუთარ მოქალაქეებს უფლებებს ანიჭებენ ან უზღუდავენ. თუმცა ამ მკაფიოდ გავლებული საზღვრების მიღმა, მათ ზემოთ თუ მათ შიგნით, შექმნილია პარალელური სამყარო, რომელიც ათასობით ექსტრატერიტორიული ზონისგან შედგება. ეს ზონები დიდწილად დამოუკიდებლად ფუნქციონირებს და სულ უფრო მეტად მდიდრებისა და გავლენიანების ინტერესებს ემსახურება.

ატოსა აბრაამიანი ამ ფარული სამყაროს წარმოშობას XIII საუკუნის შვეიცარიამდე იკვლევს, სადაც ღარიბი კანტონები გასაყიდად იმ რესურსს იყენებდნენ, რაც გააჩნდათ — ადამიანურ სხეულებს, დაქირავებული მებრძოლების სახით.

მისი განვითარების ისტორიის სხვადასხვა ქვეყანაში კვალდაკვალ მიყოლისას ავტორი გვიჩვენებს, როგორ შეუწყვეს ხელი მის გავრცელებას სახელგანთქმულმა ეკონომისტებმა, ექსცენტრიკულმა თეორეტიკოსებმა, შორსმჭვრეტელმა სახელმწიფო მოღვაწეებმა და კონსულტანტებმა.

ასე გავრცელდა ეს სისტემა სხვადასხვა ფორმით:

• თავისუფალი ვაჭრობის ზონების სახით;

• მოხერხებულობის დროშების (სხვა ქვეყნის გემების რეგისტრაციის სპეციალური სისტემის) მეშვეობით;

• ოფშორული საიმიგრაციო დაკავების ცენტრებში, სადაც მიგრანტები გაურკვეველ მდგომარეობაში წლობით რჩებიან;

• სპეციალურ ქალაქებში, რომლებსაც უცხო ქვეყნების მთავრობები და მრავალეროვნული კორპორაციები აკონტროლებენ.

ეს ფარული სამყარო კოსმოსშიც კი აღწევს, სადაც პატარა ლუქსემბურგი ასტეროიდებზე სამთო-მოპოვებითი საქმიანობის უფლებების მოპოვებას ესწრაფვის.

წიგნში „ფარული გლობუსი“ (The Hidden Globe) ატოსა აბრაამიანი გვიხატავს იმ დაფარულ გეოგრაფიას, რომელიც განსაზღვრავს, თუ ვინ იგებს და ვინ აგებს ახალ გლობალურ წესრიგში — და გვაფიქრებს იმაზეც, შესაძლებელია თუ არა ამ რეალობის შეცვლა.

ეს წიგნი ერთდროულად გვხიბლავს, გვაღიზიანებს და შთაგვაგონებს.

„თვალსაჩინო, გამაოგნებელი აღმოჩენებით სავსე.“ — The New Yorker

„ატოსა აბრაამიანი გაბედულად გვიცვლის რეალობის აღქმას და ბრწყინვალედ გვიხსნის ჩვენს პოლიტიკურ ჩიხს.“ — პანკაჯ მიშრა, წიგნის The Age of Anger ავტორი.