„ამ წიგნს მხოლოდ მისი ბრწყინვალე მხატვრული გაფორმების გამოც კი ვიყიდდი. ტექსტი ხან მაცინებდა, ხან მატირებდა: მეცინებოდა იმიტომ, რომ ყველაფერი ასე ზუსტად არის აღწერილი, და მეტირებოდა იმავე მიზეზით.“ — დეივ ტროტი

„იუმორისტული, პირდაპირი და დაუნდობელი წიგნია, რომელიც შესანიშნავი გზაა იმის გასააზრებლად, თუ როგორ შეგვიძლია უკეთესად ვიმოქმედოთ იმ ქაოსში, რომელიც ბრენდინგში, მარკეტინგსა და რეკლამაში თავად შევქმენით. წაიკითხეთ და იტირეთ — იტირებთ იმიტომ, რომ ამ ყველაფერში საკუთარ თავსაც ამოიცნობთ და ინანებთ კიდეც, რომ ამოიცანით.“ — ვიკი როსი

იცნობთ ისეთ მუსიკალურ ჯგუფებს, რომლებიც მუდმივად იცვლიან საკუთარ სტილს და ყოველი ახალი ალბომით გაბედული ექსპერიმენტებისა და ახალი მიმართულებებისკენ ისწრაფვიან?

მაგრამ არსებობენ სხვა ჯგუფებიც, რომლებიც ერთსა და იმავე სტილს მიჰყვებიან და ვერასდროს აღწევენ სადებიუტო ალბომის წარმატებას.

თუ მეორე ტიპის ჯგუფები გირჩევნიათ, ეს წიგნიც მოგეწონებათ. მარკეტინგზე შექმნილ ლიტერატურაში ის, შეიძლება ითქვას, ჯგუფ Weezer-ის მეორე ალბომს ჰგავს — ისევ იგივე სტილი, ოღონდ არც ისე კარგი.

თუმცა, თუ ამ სტილის მოყვარული ხართ, აქ ნამდვილად ბევრ საინტერესო რამეს იპოვით.

„როგორ აფუჭებენ ბრენდები ყველაფერს“ (How Brands Blow) აგრძელებს იქიდან, სადაც ავტორის წინა წიგნი „ბრენდების დიდების ილუზია“ (Delusions of Brandeur) დასრულდა. აქ კვლავ შეხვდებით იუმორს, ზოგჯერ საკმაოდ გონივრულ მოსაზრებებს და მარკეტინგის ინდუსტრიის იმ სასაცილო წარმომადგენლების დამსახურებულ კრიტიკას, რომლებიც საკუთარ თავს ზედმეტად სერიოზულად აღიქვამენ.