საამაყოა, როდესაც ქართული ლიტერატურული კლასიკა ხელმისაწვდომი ხდება უცხოელი მკითხველისთვის. ინგლისურად თარგმნილი წიგნებით მსოფლიოს დიდი ნაწილი ეცნობა ჩვენს ქვეყანას, მის ჭეშმარიტ საგანძურს.

კიდევ უფრო სასიამოვნოა, როცა არაქართველ ავტორს უჩნდება მისი თარგმნის სურვილი. ერთ-ერთი ასეთი გახლავთ თანამედროვე ბრიტანელი ლიტერატურათმცოდნე, მწერალი და მთარგმნელი დონალდ რეიფილდი, რომელმაც არაერთი წიგნი შექმნა რუსული და ქართული ლიტერატურის შესახებ. მას ინგლისურად თარგმნილი აქვს აკაკი წერეთლის, ოთარ ჭილაძის ნაწარმოებები. 2015 წელს კი გამოიცა მის მიერ თარგმნილი "კვაჭი კვაჭანტირაძე", რომელიც დიდ ქართველ პროზაიკოსს მიხეილ ჯავახიშვილს ეკუთვნის და პიკარესკული რომანის მართლაც გამორჩეული ნიმუშია.