სიკვდილი დიდად სასიამოვნო არ არის… თუმცა, ყოველ შემთხვევაში, ამით საარსებო წყაროს მაინც შოულობ.

მიკი ბარნსი შეუცვლელი თანამშრომელია — უფრო სწორად, ერთჯერადი მუშაკი, რომელიც ადამიანთა ექსპედიციასთან ერთად ყინულოვან პლანეტა ნიფლჰაიმის კოლონიზაციაში მონაწილეობს. როდესაც რომელიმე მისია მეტისმეტად სახიფათოა, თვითმკვლელობის ტოლფასიც კი, ეკიპაჟი სწორედ მიკის მიმართავს. ყოველი სიკვდილის შემდეგ მისი ახალი სხეული აღდგება და მეხსიერების დიდი ნაწილიც შენარჩუნებული აქვს. ექვსი სიკვდილის შემდეგ მიკი 7 უკვე კარგად ხვდება, რა პირობებზე დათანხმდა და რატომ იყო ეს კოლონიზატორის ერთადერთი ვაკანსია, როდესაც სამსახურში მოეწყო.

ერთ-ერთი ჩვეულებრივი სადაზვერვო მისიის დროს მიკი 7 უგზო-უკვლოდ იკარგება და დაღუპულად მიიჩნევენ. როდესაც ის კოლონიის ბაზაზე ბრუნდება — თანაც გასაოცრად, ადგილობრივი სიცოცხლის ფორმების დახმარებით — მისი ბედი უკვე გადაწყვეტილია. მის ნაცვლად ახალი კლონი, მიკი 8, უკვე მზად არის ერთჯერადი მუშაკის მოვალეობების შესასრულებლად. მაგრამ ასეთი მუშაკი მხოლოდ ერთი შეიძლება იყოს.

თუ მიკი 7 მეთაურობას შეატყობინებს, რომ გადარჩა, ერთ-ერთი მათგანი გადამუშავების დანადგარში აღმოჩნდება. ხოლო თუ გადარჩენას დამალავს და ტყუილში გამოიჭერენ, ორივეს განადგურება ემუქრება.

ამასობაში ნიფლჰაიმზე ცხოვრება სულ უფრო აუტანელი ხდება. ატმოსფერო ადამიანებისთვის შეუფერებელია, საკვების მარაგი იწურება, ხოლო პლანეტის დედამიწის მსგავს გარემოდ გარდაქმნის პროცესი — ტერაფორმირება — წარუმატებლად მიმდინარეობს. პლანეტის ადგილობრივი ბინადრები ახალ მეზობლებს სულ უფრო მეტი ინტერესით აკვირდებიან, რაც მეთაურ მარშალს დიდ შიშს ჰგვრის.

საბოლოოდ, ორივე სახეობის გადარჩენა მიკი 7-ზე იქნება დამოკიდებული.

ოღონდ მანამდე როგორმე უნდა მოახერხოს, რომ სამუდამოდ აღარ მოკვდეს.