ეს წიგნი გამოიცა ნიეპსის პრემიის (Prix Niépce) ფარგლებში, რომელთანაც გამომცემლობა The Eyes Publishing 2019 წლიდან თანამშრომლობს. გამომცემლობა პრემიის ლაურეატს სთავაზობს მხატვრული გამოცემის გამოქვეყნებას, რომლის ტირაჟი მხოლოდ 400 ეგზემპლარს შეადგენს. შეზღუდული ტირაჟით გამოცემებს Picto Foundation უჭერს მხარს.

2021 წელს ნიეპსის პრემია გრეგუარ ელუას (Grégoire Eloy) მიენიჭა.

„ომალო“ (OMALO) წარმოგვიდგენს გრეგუარ ელუას მიერ საქართველოში რეზიდენციის ფარგლებში შექმნილ ფოტოგრამების სერიას. კავკასიის ამ მივარდნილ მხარეში ფოტოგრაფი ერთდროულად იკვლევს დროს, მეხსიერებასა და ცოცხალ სამყაროს და კვლავ გვთავაზობს საკუთარ ხედვასა და კითხვებს თავად გამოსახულების არსის შესახებ.

ფოტოგრამებისა და მათი შექმნის გარემოს ამსახველი ფოტოების მონაცვლეობით გრეგუარ ელუა ჩვენს წარმოდგენას გამოსახულების შესახებ არღვევს და ახლებურად გააზრებას გვთავაზობს. ყოველი გადაღების პროცესი ორ გამოსახულებას წარმოშობს: ფოტოგრამას — სივრცეში მოთავსებულ ფოტომგრძნობიარე ქაღალდზე ფლეშის სინათლის ზემოქმედების შედეგად მიღებულ გამოსახულებას — და გადაღების გარემოს ამსახველ ფოტოს, ანუ კამერით დაფიქსირებულ გამოსახულებას.

გამოსახულების შინაგანი და გარეგანი მხარეების, ან უფრო ფართოდ, თავად გამოსახულების არსის ამ შეგრძნებას წიგნის დიზაინიც აგრძელებს. მისი მაკეტი მკითხველს ფოტოგრაფიის სხვადასხვა ზედაპირსა და შრეს შორის დახვეწილად აგებულ ვიზუალურ გზას სთავაზობს.