„არაფერი ისე არ ამაღლებს განწყობას და არ ქმნის წმინდა სიხარულის მომენტს, როგორც სანელებლებითა და ციტრუსით არომატიზებული, იდეალურად მსუბუქი ბისკვიტი ან შაქრის პუდრით მოყრილი ორცხობილა“.

საკონდიტრო ნაწარმისა და დესერტების თავის ახალ, შთამბეჭდავ კულინარიულ წიგნში იოტამ ოტოლენგი და მისი მრავალწლიანი პარტნიორი ჰელენ გო სამზარეულოში შემოიტანენ ოტოლენგის საფირმო შტრიხებს — ახალ, გამორჩეულ ინგრედიენტებს, ეგზოტიკურ სანელებლებსა და კომპლექსურ არომატებს, მათ შორის ლეღვს, ვარდის ფურცლებს, ზაფრანას, ანისულს, ფორთოხლის ყვავილს, ფისტასა და ილის. ეს ყველაფერი თავმოყრილია უგემრიელეს ნამცხვრებში, ბისკვიტებში, ტარტებში, პუდინგებში, ჩიზქეიქებსა და ნაყინებში.

წიგნი „ტკბილი“ (Sweet) მოიცავს 110-ზე მეტ ინოვაციურ რეცეპტს, რომლებსაც თან ახლავს ჯილდოს მფლობელი ფოტოგრაფების, Peden + Munk-ის მიერ გადაღებული ულამაზესი ფოტოები. აქ ნახავთ ისეთ კერძებს, როგორებიცაა: მაყვლისა და ვარსკვლავური ანისულის ფრიანები (ფრანგული ნამცხვრები), ტაჰინისა და ჰალვას ბრაუნები, სპარსული სიყვარულის ნამცხვრები, ახლოაღმოსავლური „მილიონერის შორთბრედი“ და ზაფრანის, ფორთოხლისა და თაფლის მადლენები, ასევე უფქვილო შოკოლადის ფენოვანი ნამცხვარი ყავით, ნიგვზითა და ვარდის წყლით, და დარიჩინის პავლოვა პრალინეს კრემითა და ახალი ლეღვით.

აქ ყველასთვის მოიძებნება რაღაც აღმაფრთოვანებელი — დაწყებული მარტივი მინი-კექსებითა და ორცხობილებით, რომლებიც მშობლებს შეუძლიათ შვილებთან ერთად მოამზადონ, დამთავრებული გრანდიოზული ფენოვანი ტორტებითა და რულეტებით, რომლებიც გამოცდილ კონდიტერებს ფანტაზიას ხელახლა გაუღვიძებს.